Episode 11: “Catch Me If You Can!”

Tilamsik sa Gabing Maligamgam (an FB broken serye)

Ang Nakaraan…

Maraming nagsasabi na hindi na ito mahalaga sapagakat ang importante ay ang ngayon. Subalit papaano kung dumating ang panahon na wala ka nang maalala? Maski mga kapamilya mo hindi mo na nakikilala at ang masama nito, ultimong sarili mo ay hindi mo na din kilala. Ngayon, sino ka?

Mabibigyan ba ng makabuluhang kahulugan kung sino ka ang tanong na sino ka sa pamamagitan ng iyong mga maaalalang mga nakaraan? Samakatuwid ang nakaraan ay isa lamang palang alaala na walang kasiguraduhan kasi marahil ito ay bunga o gawa-gawa lang ng iyong mapaglarong isipan.

Kaya naman kung darating ang panahon na wala ka nang maalala ay wag mo nang piliting alalahanin pa ang hindi mo na maalala lalung-lalu na kung bakit wala ka nang maalala dahil ang importante nga ay ang ngayon, kung sino ka ngayon? Ikaw na ngayon ang Taong Walang Alaala.

Sa pagpapatuloy…

Biglang lumabas ng bar ang guy na nakapolong bukas at may white sando fit sa loob na kasama ni Genoveva at ito ay nagtatalak.

“Ay putang ina anong ibig sabihin nito? Mga hayup kayo anong ginagawa nyo diyan?!”, hurumintadong pagtatanong ng guy na nakabukas ang polo at may white sando fit sa loob.

“Babae, lalake (habang tinuturo ang isa’t-isa), magkadikit ang mga labi, espadahan ng dila. Wag kang magalala nagkukwentuhan lang kame!”, pilosopong sabat naman ni Rogelio, uso kasi.

“E gago pala ‘to e!”, sabay takbo ng guy na nakabukas ang polo at may sandong fit sa loob papalapit kila Genoveva.

“Takbo!”, karipas na kayag ni Rogelio ke Genoveva habang sila ay magkahawak kamay.

Tulad nang nakagawian sa mga primetime at afternoon teleserye na malapit nang magtapos ay biglang nagkaron ng habulan. Sana lang wag mong mahulaan na maaaring magkaron din dito ng patayan o barilan, mabuti na nga lang wala pang anak-anak ang mga bida dito dahil kung hindi malamang magkaron din ng child switching dito. Siguro sa season 2 na ‘yun.

Tuloy ang habulan kahit madulas ang daan.

“Bumalik kayo rito hindi maaari ‘yang ginagawa nyo!”, sigaw ng guy na nakapolo at may white fit sando sa loob.

“Pabayaan mo na kame, wag mo na kame pakealamanan nakikiusap ako sayo!”, pagsusumamo ni Genoveva habang tumatakbo.

“Tama siya! Bayaan mo na kame tol!”, hingal pagsang ayon ni Rogelio kay Genoveva.

“Hindi! Hindi ‘yan maaari! Hindi ako makakapayag! Andito ko upang hadlangan ang pagmamahalan nyo!”, mariing pagmamatigas ng guy na nakbukas ang polo at may sandong puti sa loob.

Mas binilisan pa nya ang pagtakbo. Halos lumapit na ang distansya nya kila Rogelio na ngayon ay magkahawak pa din ang kamay. Subalit nabitiwan nila ang isa’t-isa nang biglang akmang dadakmain ng guy na nakabukas ang polo at may white sando fit sa loob ang kanilang mga braso.

“Ah! Gelo!”, “Gen-gen!”, sigaw ng dalawa.

Napatakbo sa magkabilang direksyon ang dalawa. Tuluyan na kaya silang magkakahiwalay at hindi na muling magkikita pa? Teka hindi pa tapos ang habulan. Si Rogelio ang sinundan ng guy na nakabukas ang polo at may white sandong fit sa loob.

“Hindi mo ko matatakasan!”, nagmamadaling sigaw ng guy.

Tuloy lang sa pagtakbo si Rogelio. Napakatulin tumakbo ng guy gawa ng mahahaba ang mga biyas nito kaya’t sa isang iglap, mistulang leon ay dinamba nya si Rogelio. Sumubsob ang dalawa sabay nagpagulong-gulong sa damuhang medyo maputik. Naputikan ang white sandong fit ng guy na labis nitong kinagalit.

Walang sabi-sabi nag undayan sila ng sapak, basagan ng mukha. Suntok dito, suntok dun. Tadyak dito, tadyak dun habang sila ay nagpapagulong-gulong.

Medyo argabyado si Rogelio sapagkat hindi hamak na mas malaki ang kaha ng guy na nakabukas ang polo kesa sa kanya. Mas maskulado, may abs, at higit sa lahat naka-brush up.

Hanggang sa dumating ang sandali na nakubabawan si Rogelio ng guy na nakabukas ang polo. Hindi na sya makapalag o makapanlaban man lang. Walang habas na pinagsasapak siya nito.

“Sinabi ko nang hindi pwedeng maging kayo! Hindi pwede! Ang tigas ng ulo mo! ‘Yan ang bagay sayo!”, galit na galit na sabi ng guy habang patuloy sa pagsuntok sa barag-barag na mukha na ngayon ni Rogelio.

Papunta na sa puntong mawawalan na ng malay si Rogelio habang ang guy ay abala sa paghahanda at pag umang ng kanyang kamao upang pakawalan sa mukha ni Rogelio ang kanyang final ultimate punch nang biglang dumating si Genoveva at pinukpok sya ng malaking bato sa ulo ng buong puso mula sa likuran.

Bagsak ang guy na nakabukas ang polo at may sandong puti sa loob,  nagkikikisay.

Saan hahantong ang kaguluhang ito? Tuluyan kayang may paglamayan? Kung meron sino sa dalawa? Mahadlangan pa kaya ng guy na nakabukas ng polo at may sandong puti sa loob ang pagiibigan nila Rogelio at Genoveva? Bakit tuwing magpapasukan isinasabay ang pagkukumpuni ng mga daan? Ano kayang misteryo ang bumabalot dito?

Abangan ang mga nagbabagang kasagutan sa nalalapit na pagtatapos at huling episode ng kauna-unahan at wala nang nais sumunod pang brutal drama serye rito sa internet ang, Tilamsik sa Gabing Maligamgam the final chapter.

Episode 10: “Beer Into Blood”

Tilamsik sa Gabing Maligamgam (an Fb broken serye)

Ang Nakaraan…

Parang pinagsakluban ng langit at impyerno si Rogelio nang makita si Genoveva na may kasamang patok na guy na nakasuot ng bukas na polo, may white fit sando, at naka-brush up ang buhok sa kabilang table. Samantala abala si Jobert as a friend sa pagkastigo sa wicked heartless waiter na sa kaibigan ay naniningil.

Biglang tumayo si Rogelio.

“Uy bro sandali san ka pupunta? Maghunos dili ka!”, awat ni Jobert as a friend.

“Hindi ko na kaya ‘to bro, labis-labis na ang aking pagtitiis, ansakit-sakit na…”, malumanay subalit firm na statement ni Rogelio.

“Mapapahiya ka lang kapag ginawa mo ‘yan bro, wala kang karapatan sa kanya!”, nagaalalang payo ni Jobert as a friend sa kaibigan.

“Hindi. May karapatan ako, dahil mahal ko sya mahal na mahal! (at nagsimulang tumulo ang luha sa mga mata ni Rogelio) Kaylangan ko na syang kastiguhin…”, sabay sugod sa table ni Genoveva.

Wala nang nagawa si Jobert as a friend kundi sumigaw ng palakaibigan at mahabang pagpigil na “Brooooooooooooooooooooooooooooo”, with feelings.

Pagdating sa table nila Genoveva, bumanat agad antimano si Rogelio.

“Anong ibig sabihin nito?”

“May alak, may pulutan, may yosi, prayer meeting ‘to tol!”, maaskad na tugon ng guy.

“Wag mo ko pilosopohin ano ibig sabihin nito?!!”, nanggagalaiting bulyaw ni Rogelio habang hinihimas ni Jobert as a friend ang kanyang likuran.

“Gelo let me explain…”, pagsusumamo naman ni Genoveva.

“Sino ka ba ha? Ano bang pake mo kung nagiinuman kame?”, imbyernang sagot ng guy sabay tayo at poste kay Rogelio, harapan na para bang dinudutdot niya ito ng kanyang maskuladong dibdib.

“Ano din pake mo kung sino ko ha?!”, pabulyaw pa din  si Rogelio at patuloy lang sa paghimas ng kanyang likod si Jobert as a friend.

“Wala kong pake kung sino ka, ang tinatanong ko bakit ka nakikialam dito ha?!”, maaskad ule na tugon ng guy sabay bagsak ng kanyang shades sa table.

“Pare mahal ko ‘yang ka-table mo, na-love at first sight ako diyan kaya hindi mo pwede basta-basta ite-table ‘yan, ide-date at aayaing uminom gets mo ba ha?!”, proud na proud na sagot naman ni Rogelio habang hinihimas pa din ni Jobert as a friend ang kanyang likuran.

“Hahahaha! E gago pala ‘to e!”, tawa ng guy sabay sapak sa kausap. Subalit mabilis nakaiwas si Rogelio, bilang kaibigan si Jobert as a friend ang tinamaan na nasa likuran. Bulagta ito, basag ang nguso.

“Oh my gad, blood! Tama na guys, ayoko naaaah!”, tili at paghi-hysterical ni Genoveva nang makita ang duguan at sumisiritsirit pang dugo sa nguso ni Jobert. Nagtatakbo sya palabas ng bar. 

Napahinto lahat ng tao sa bar pati na din ang banda na kasalukuyang tinutugtog ang acoustic version ng Gentleman ni Psy. Nahahati ngayon ang isip at damdamin ni Rogelio kung sinong uunahin sa dalawa, kung hahabulin ba nya ang babaeng kanyang sinisinta o aasikasuhin ang kaibigang duguan ang mukha.

Gulong-gulo si Rogelio. Ang hirap magdisisyon. Ngunit biglang hinawakan ni Jobert as a friend ang kanyang kamay. Pilit nya itong inabot dahan-dahan habang nakahiga. Napatingin si Rogelio sa kaibigan, awang-awa.

“Chong. Ako na bahala dito, kaya ko ‘to. Sundan mo si Genoveva, importanteng makausap mo siya. Sige na dre, gow…Ah.!”, hinang-hina na sabi Jobert as a friend sa kanyang kaibigan habang sumisirit-sirit pa din ang dugo sa kanyang nguso.

“Hindi brad dadalhin kita sa ospital. Walang iwanan.”

“Sige na par puntahan mo na siya, kaya kong pumunta sa ospital…”, sabay suka ng dugo habang tumutulo ang uhog sa ilong at tumatagas ang luga sa tenga.

“Sigurado ka pards?”

“Oo bro, sige na gow!”

“Sige-sige, salamat dre! Tunay ka talagang kaibigan!”, sabay karipas ng takbo palabas si Rogelio.

“What are friends are for? Ah…”, sabay pikit ni Jobert as a friend. Tuluyan na siyang nawalan ng malay.

Sobrang na-touch naman ang lahat ng taong nakapaligid sa kanya, kaya hindi nila mapigilang magsabi sabay-sabay ng “Aaaaaay”, yung malumanay at may lambing sa dulo. Nag akapan pa nga ang iba, may mga nag-kiss, at meron din napaluha sa sobrang pagkaka-touch. Kaya agad itong sinamantala ng banda, bigla silang tumugtog ng isang tear jerker epic love song na King and Queen of Hearts by David Pomeranz in acoustic version.

Parang may biglaang JS naman na nagsipagsayawan sa gitna ang mga lovers, magkaakap, sweet na sweet. ‘Yung iba naglalaplapan pa habang si Jobert bulagta sa sahig at halos maligo sa sarili niyang dugo. Ganun katindi ang pagmamahal ni Jobert as friend sa kanyang friend. Bilang kaibigan gagawin at titiisin niya lahat para dito.

Samantala mabilis na nahabol ni Rogelio si Genoveva sa labas, agad niya itong hinawakan sa braso.

“Gen-gen sandali.”

“Gelo let me explain-“

Pero pinigilan siya ni Rogelio magsalita, tinakpan niya ng kanyang hinlalato ang lips ni Genoveva upang hindi makapagsalita.

“Hindi. Tama na. Wala kang dapat ipaliwanag mahal kita.”, sabay hawak ng dalawang kamay sa braso ni Genoveva papalapit sa kanya saka niya tinorrid kiss si Genoveva. Sa sobrang pagkabigla at gulat naman ni Genoveva sa ginawa ni Rogelio napanganga na lang ito sabay wagayway ng dila at ngasab sa wet na wet na labi ni Rogelio.

Dahan-dahan bumuhos ang ulan habang sila ay naglalaplapan sa gitna ng daan.

Kaylan matatapos ang halikan na ito? Matuyuan kaya sila ng laway miski na umuulan? Gaano katotoo na naapak-apakan na si Jobert as a friend ng mga nagsasayaw ng sweet sa loob ng dance floor? Hindi ba sila nadudulas sa tumagas na dugo ni Jobert as friend?

Subaybayan ang mga nagbabaga at walang masagot na katanungan sa natitirang dalawang last episode ng nagiisa at wala pa ding gustong gumaya o pumaris na brutal drama serye sa internet, ang Tilamsik sa Gabing Maligamgam.

Para sa ating Question of the Day Promo:

“Mga ilang minuto kaya tumagal ang laplapan nila Rogelio at Genoveva?"

Pangalawa.

“Ano kaya ang type ng dugo ni Jobert as a friend at gaano karami ang nabawas sa kanya?"

Episode 5 Season 1.

TILAMSIK SA GABING MALIGAMGAM (an FB broken serye)

Ang Nakaraan…

May tumawag sa cellphone ni Rogelio.

Episode 5 Season 1: “Hello, is it me you’re looking for?”

“Hello?”

“eee-aaa-eee.”

“Hello? Hello?

“iii-eee—aaa-“

“HELLO! Sino ‘to?!”

“HELLO! (napa-ilag ang tenga ni Rogelio sa cellphone) Hindi mo ba ko naririnig? Kanina pa ko hello nang hello!”

“Choppy ka kaya, sina ba ‘to?”

“Is this Rogelio Bragancia Jr. aka Gelo?”

“Oo bakit may angal? Sino ka ba ha?

“Hi Gelo! Si Gen-gen ‘to remember?”

“Ge-… Weh ‘di nga? ‘Wag ka mang stir d’yan Jobert ha tatambangan kita!”

“Jobert who? Ok ka lang ba? Si Genoveva nga ‘to, ‘yung kinuha mong number sa listahan ng mga nagpapaload ke manang? Knows mo na?”

“My gad! Ha- Shet ‘di ko alam sasabihin ko. ‘Di ako makapaniwala. ‘Kaw ba talaga ‘yan my Gen-gen?”

Halos hindi magkamayaw sa pagkaligalig si Rogelio sa sobrang kilig.

“Oo nga po. So how are you?”

“Eto malapit na sa State of Nirvana.”

“Wow talaga? Nagme-meditate ka pala?”

“Naku hindi ah!”

“E bakit mo nasabi?”

“E kasi nakausap na kita.”

“Hahaha! Ang funny mo talaga! Kung katabi lang kita ngayon nasampal na kita.”

“Teka. Wala ka ba naririnig?”

“Ha? Wala naman? Bakit?”

“Ayan o anlakas-lakas, ‘di mo talaga naririnig?”

“Ano ‘yun?”

“Parang mga maliliit na pakpak na lumilipad?”

“Maliliit na pakpak…? Saan? Hmmm. Alam ko na ‘yan. Sasabihin mo nasa langit ka na at may mga angel…”

“Oops, wrong! Butterfly in my stomach po hihi”

“Hahaha you’re so cute talaga ha!”

Tuloy ang flirtan ng dalawa. Hindi nila namalayan ang oras, mutual ang feelings. Kilig na kilig, giliw na giliw. Konting pihit na lang papunta na sa SOP siguro, andun na kasi ang lalim ng hinga nila at panaka-nakang pag ungol. Masayang-masaya si Rogelio. Nakalimutan na ang mundo, andun na siya sa tugatog ng tagumpay.

“Ansarap mo palang kausap Gelo. Palagay ko in-lo-“

Biglang napabalikwas-bangon si Rogelio dahil sa malagkit na likidong dumadaloy sa kanyang mukha mula sa nakangangang bunganga ni Jobert as friend na siya naman ding ikinagising nito. 

Saan hahantong ang naudlot na panaginip na ito? Gaano karaming laway ni Jobert ang dumaloy sa mukha ni Rogelio bago siya naalimpungatan? Posible kayang sa alternate reality ay nakakausap na ni Rogelio si Genoveva? Ano ang hottest temperature na naitala sa kalakhang Maynila as of April 12, 2013? Abangan ang mga maiinit na kasagutan dito lang sa nagiisa at walang gustong pumaris na brutal drama serye sa hibla ng interner world, ang… Tilamsik sa Gabing Maligamgam.