IBA’T-IBANG URI and SECRET TEKNIK NG SELFIE:

“Even the greatest stars dislike themselves in the looking glass, even the greatest stars change themselves in the looking glass, even the greatest stars live their lives in the looking glass” ~ Kraftwerk (Hall of Mirrors)

Dahil nga ang buwan ng Oktubre ay buwan ng lasingan, nasumpungan na din naming talakayin ang ating kalasingan sa pagkuha ng sariling larawan o selfie. Kung noon masisilayan mo lang ang mga pribadong larawan ng iyong mga kaibigan, kamaganakan at mga kaklase sa kanilang photo album sa bahay ngayon hindi mo na kailangang bumisita pa sa kanila.

Selfie, alam na natin lahat ang meaning nito, ito ‘yung pagkuha ng litrato sa sarili o “sariling-sikap” gamit ang camera phone, digicam, etc. then i-a-upload to any social media website nationwide, Selca naman ang tawag sa Korea. Atleast may sarili silang term.

Matic ‘yan pag open mo ng social media account mo dagsa agad ang selfie ng mga friends mo at lahat tayo guilty rito.

Ayon sa Wikipedia ang Russian Grand Duchess Anastasia Nikolaevna ang unang teenager (age 13) na nag-selfie gamit ang portable Kodak Brownie box camera around 1900 at ipinadala ito sa kaibigan na may kaakibat na liham (oldschool caption ‘di ba?). Ilang araw muna ang lilipas bago niya malaman ang comment ng friends nya o like ba nila ito through snail mail.

Ganon kahirap ang teknolohiya noon kumpara ngayon, kaya bago ka mag-post ng iyong natatanging selfie halina’t alamin muna natin ang iba’t-ibang uri ng selfie at ang tamang teknik sa pagkuha nito.

1.Duckface – Kung noon e isa sa icon ng katatawanan ang pag-nguso ng comedian na si Kuhol ngayon epitome na ito ng ka-cutan at kakikayan. Mas mahabang nguso mas cute, samahan pa ng naniningkit at medyo papungay na mata naloko na! “Kaw na!” sabi nga.

2.Lipbite – Simple lang ‘to basta kagatin mo lang ang lips mo na para kang may masakit na singaw sapul ‘yan.

3.Mirror Selfie – Kahit saan pwede mo itong gawin basta may salamin, pero mas cool syempre kung sa CR ng isang mall, hotel, bar, etc. ang dapat lang tandaan dine ay matiyak na makuhaan ng camera sa repleksyon ng salamin ang logo ng mansanas na gamit mo.

4.Asian Looks o Japan-Japanan – Matagal na ‘tong uso, eto ‘yung pag gamit ng peace sign nag-evolve lang ngayon into something na itatapat mo dapat ang peace sign sa gilid ng mata then tiyakin na magmistulang inosente ang aura mo na may pagka Kabuki mask.

5.Emotera – Kung noon halos itago ng mga tao ang kanilang kalungkutan, ayaw magpakita ng kahinaan, pagdadalamhati, at pag iyak ngayon pinagsisigawan na ito. Mas marubdob na lungkot ng larawan mo o mas wasted ka mas cool, tiyakin din na mataymingan mo ang pagpatak ng luha mo sa pisngi bago mo kuhaan para realistic at surrealist ang peg.

6.Aling Simang – Simang short for Simangot, basta simangot ka lang pwede na ‘yan post agad. Tama nga naman kasawa na ang laging naka smile sa picture, maiba naman ‘di ba at sabi nga “smile like you mean it”.

7.Tongue Out – Walang tyak na nakakaalam kung anong meron sa psyche ng sangkatauhan kung bakit may times na naglalabas tayo ng dila pagmagpapakuha ng litrato. Maski ang mga magigiting na psychologist na sila Carl Jung at Sigmund Freud walang payak na paliwanag ukol rito.

Sa pagkakaalam namin si Albert Einstein ang unang gumawa nito, at iyon nga ang iconic press photograph nya na nakabelat. Subalit kung babalikan natin ang history kung saan di pa uso ang camera, makikita sa mga inukit na mga bato ng mga Mayans ang Emblem nilang hugis taong reptile na nakalabas ang dila. Dahil kaya ito sa Reptilian Complex part sa ating utak at same din kaya ito sa sinasabing “Tongue Flickering” na madalas makita sa mga reptile animals, ilang personalidad, at sa ilang pelikula?

May conspiracy kasi na ang nagpapatakbo raw ng mundo ay ang mga reptilian race alien, haka-haka lang ‘yan basta ang sabi ni Chinky (age 15) sure daw niya na si Miley Cyrus ang nagpauso ng tongue out teknik. Dapat daw pabilog ang dila na patulis ang dulo, huwag ilalabas lahat ‘yung tamang kita lang on either side ng lips. Oo ‘wag na ‘wag sa gitna dahil si Yves Dignadice lang ang gumagawa niyan tuwing free throw shot sa PBA noon, at ‘wag mo nga din ilabas buong dila mo hindi ka si Michael Jordan. Pero ang tongue out selfie teknik na ‘yan ay nauna nang ginamit ng bandang Nirvana sa kanilang iconic smiley logo.

8.Sleeping Selfie – Medyo mahirap ‘tong uri na ‘to ng selfie dapat inborn na sleepwalker ka para magawa ito o may sapi ka ng The Conjuring.

9.With Celebrity – Linawin lang natin, hindi ito ‘yung pagpapakuha ng picture kasama ang idol mong celebrity kundi ang pag selfie sa kanilang mga poster. Poster ng pelikula, magazine, billboards, endorsement, commercial sa tv etc.

10.Rocker Gangster – Para din itong Japan-japanan selfie ang kaibahan lang e ang hand sign na gamit. Dapat din ‘di ka nakangiti pag ginawa mo ‘to, suplado ka dapat pakita mo ang angst mo at galit mo sa mundo lalu na sa mga nagpo-post ng pa-cute na picture nila sa FB. Dapat maramdaman nila ang inis, suklam, at suya mo sa tulad nila na puro selfie ang inaatupag sa selfie na ito. Dahil ito ang statement mo na nagsasabing hindi mo sila ka-uri, na iba ka sa kanila. Yeah!

11.Cleavage Kuyukot Selfie – Ay wala kameng ibang masasabi rito kundi isang malaking CHECK! Eto ang the best selfie sa lahat talaga ‘wag ka na kokontra, tuloy lang, malaki ang tulong nito sa mga kalalakihang nagtitipid o walang pambili ng FHM o Playboy magazine. Kaya salamat rito.

12.Kain-kain Pag May Time – Marahil epekto ito ng Last Supper syndrome nang ipinta ni Da Vinci ang huling hapunan ni Kristo kasama ang kanyang mga apostol. Dahil kung sila Jesus nga proud na tinapay at wine lang ang hapunan nila, at ang ating presidente na nakakaawang hotdog sandwich lang ang kinain sa isa niyang conference sa ibang bansa, tayo pa kaya na sangkatutak na putahe ang nasa mesa? Syempre marapat lang na malaman ‘yun ng sambayanang Pilipino.

13.Party-party! – Kung karapatan ng mundo na malaman kung ano ang kinakain mo umaga, tanghali, gabi, karapatan din ng sangkatauhan na malaman kung gaano kasaya ang buhay mo at kung san ka naglalagi sa pamamagitan ng pagpicture na ikaw ay nasa party o inuman. Siguraduhing nakanganga ka, kaakbay ang isa o dalawa sa mga friends mo, mas mainam kung pare-pareho kayong may tangan ng bote o baso ng beer pag ginawa ito para talagang ma-absorb ng mga magbu-view nito kung gano ka kaligaya nung gabi at puntong ‘yun.  

14.With Pet – Statement mo ‘yan na nagpapakita na loving and caring human being ka, pagpapahiwatig mo ‘to na there’s more to life than taking a picture with what you eat because you can do it also with your pet. Siguraduhin na hug-tight o kina-cuddle mo ang pet mo pag ginawa ito para madama ka ng mga friends mo sa social media kung paano ka magaruga at malaman nila na isa kang matino at mabuting Filipino Citizen.

15.Normal – Safe mode ka lang dapat dito, kung maaari poker face ka tipong mala ID picture ang peg mo ‘wag mo hayaang ni katiting na hint mahulaan nila kung ano ang nasa isip mo nung nag selfie ka ng ganito para andun ang mysterious effect mo at mapapaisip sila na isa kang deep person.

16.Morning Selfie - Syempre kung may pag selfie ng tulog dapat meron din ang bagong gising. Importante kasing makuhaan mo ng litrato ang itsura mo pagkagising na pagkagising antimano upang malaman ng mga freinds mo na hindi ka tulo laway at hindi ka nagmumuta sa pagtulog. Dahil ang sabi nga din nakikita ang natural na kagandahan o kagwapuhan sa bagong gising na mukha. 

Gawin ito bago ka pa makapag inat o hikab para talagang sariwa pa ang moment ng pag gising mo. Lagyan ng sinserong caption na "Goodmorning Frenz!" o dili kaya'y "Just woke up" para mas bet ng iyong mga kaibigan.

At ayan ang ilan sa mga uri at teknik ng pagkuha ng selfie, gabay lamang ang mga ito maari kang gumawa ng sarili mong statement at mag-eksperimento. Be creative, para iyong-iyo o selfieng-selfie talaga ang selfie mo. Mangyari lamang na ugaliing tandaan at isa-buhay ang lagi naming paalala na wag na wag gagamitin sa anumang uri ng kasamaan ang inyong natutuklasang mga secret teknik at lihim na kaalaman upang hindi makaperwisyo sa sambayanang Pilipino at kapwa tao.

*Cover photo via Wikipedia, unidentified woman taking her own photograph using a mirror and box camera around 1900.